Kum thar kan chuang kai a, ngaihtuahna thar hmangin thu delhkilh leh tiam hrang hrang nei pawh kan awm ngei ang. Kan thutiam hi a rinawm tur a ni a, a tha zawngin keimahniah nghawng a nei ngei tur pawh a ni. Chutiang chuan ti fo thei bawk ila, kumtin hi kumtha a ni anga, kan thutiam hi a va hlu dawn em.
 |
| January Issue Cover |
Mahse, theihloh hi kan ngaihtuah fo a, kan theihtawk hi kan hai a, tam tak chu beidawngin an indawmkun nghal ngawih zel zawng a nih ber hi maw.. Zirlai kan ni emaw hnathawk kan ni emaw kan tum leh thiltihah hian chiang ila, keimahni theuhah hian a tha zawnga nunphung thlak leh khawsak hi kan tum fo zawk tur a lo ni. Chu chu a ni, hnampui tia kan hriat tam takte dinchhuahna.
Chhut mi te chuan an ti thin. Kan ramah chuan nausen a rawn pianchhuah hian cheng vaibelchhe chuang fe leiba nei nghal ang a ni a, chuti khawpa a rampum ang pawha leiba ngah ni chung si chuan thawh hreh ngah em em leh eitur tuihnai fe fe duh ve tho si kan thahnem hle thung a, kan hnam nunphung hi kan inrin hma hian a danglam hret zawng a ni. Nang chu finna zir tur i ni asin.
Tun dinhmunah chuan zirlai naupang tam zawk chuan an textbook ni lo chu chhiar tur a ni lo emaw tiin, lehkhabu tha leh chanchinbute chu pitar/putar te, nu leh pate chhiar tur emaw ti tlat tawh an awm a, an chhiar peih loh chu thuhran nise Mizo tawnga lehkhabu chhuak reng reng thing ti em em an awm ta bawk. Zah nachang hre tur hi chu kan ni. Mahse, zaha la reng reng kan awm si lo. Eng lai atang hian nge siamthat kan ngaih tak ang? Nang chu chutiang ni ve suh ang che.
He kumtharah hian ngaihtuahna fim hmang la, nangmah atang khan thiltha a chhuak thei tih hria la, thutiam nghet nei la, inchhiar zau peih mi ni la, i ram leh hnam hi humhalh tlat bawk ang che. Chutiang tur chuan he kumthar hi i tan kum tha lo ni mawlh bawk rawh se.
No comments:
Post a Comment