RAM LEH HNAM HUMHALH KAWNGA ZIRLAITE MAWHPHURHNA

MZP Chanchinbu January 2016

(MZP Inter- College Essay Writing Competetion kan neih tuma thuziak rawn thehluh
 zinga mi a ni.    - Editor)

- VL. Rorelfela
Government Aizawl College

    Kan zo\awng ah hian ‘humhalh’ tih thumal hi kan hmang rim malh malh hle a, tunlai

VL.Rorelfela

khawvelah ngat phei chuan kan hmang zing lehzual ni in alang. Amaherawhchu he thumal hi a ropui ang leh kan hman uar ang ai hian a nihna ang tak zu man pha a, a nihna ang tak phawk chhuak zo chu kan tlem hle awm asin. Humhalh tih chuan thil eng emaw riral mai thei, tichhe theitu thil chi hrang hrang leh  tiboral theitu laka venhim hi a kawk ber awm e. Chutiang anih tak si avang chuan ‘ram leh hnam humhalh’ han tih ringawt mai pawh hian ‘ram leh hnam’ chu humhalh anih loh chuan rirala, boral mai thei a nihzia a tarlang chiang hle a, a chunga kan sawi tak ang khian ram leh hnam humnhalh tih thu  hi a nihna ang tak taka hmanga, ram leh hnam  humhalh tak tak chu uanpui tlaka hlei pawh kan awm lo mai awm mange aw tih mai tur chu a ni lawi si a ni.

    Chutiang boruak tehnuaih karah chuan zirlaite hian eng nge maw tih theih kan neih ve reng renga, eng nge maw mawhphurhna kan neih ve reng reng le? Tih zawhna pawimawh tak mai chu tudang chhan tur leh tudang ngaihtuah tur ni lovin, zirlaite ngaihtuah tur zawhna pawimawh tak chu a ni ta a ni. Mahse, tute nge zirlaite chu le, eng chin hi nge zirlai chi chu ni ta? Eng zir te hi nge zirlaite chu? Hrilhfiahna tam tak chu a awm thei anga chung hrilhfiahna tam tak zinga ka lakchhuah duh tak chu ‘eng zirna in pawh ni se la, eng thil pawh zir se la, an zirsang emaw an zirhniam emaw chutiang mi chu zirlaite chu an ni’ tih hi a ni.  Mi \henkhat thung chuan ‘mi tupawh hi an damchhung chuan zirlai an ni’ tepawh an ti \hin, a dik viau ta ve ang. Amaherawhchu hrilhfiahna hmasa zawk khi  ring phawt mai ila. Zirlai kan tihchuan Kg-1 a\anga MA, MSc., M.com zir ringawt hi kan huam tir thei lovang a, Computer zirte, kutthemthiamna lama zir te, mobile phone chhe siam zir te leh a dangte  thleng in a huam vek a ni. Chutiang mite chu zir lai an ni a, zirlai an nihnaah leh an thil tihna kawng hrang hrangah kan ram leh hnam humhalh ngai tak mai  humhalh chu an mawhphurhna, kan mawhphurhna a ni.

    Kum 1966 a lo nih meuh chuan mizo tlangval huaisen tam tak te chu ram leh hnam lainatna leh hmangaihna vangin India ram lian tak chu do let turin  an ram mu ta mep mep mai a. An tum ber chu chu ram leh hnam humhalh a, ram leh hnam hmasawn zawk kan lo nih theih nan a ni.  Khatih hunlai a\ang daih tawh khan zirlaite hian ram leh hnam humhalhna kawngah hian mawhphurhna lian tak kan lo nei tawh a ni tih kan hmu thei awm e. Zirlai Pawl hruaitute pawh ram leh hnam chhana humhalh nan an lo rammu ve hial tawh anih kha. Kha tih hunlai, Mizoramin zalenna a sual lai 1966-1986 inkarah khan Zirlai Pawl hruaitu mai ni lo, zirlai tam tak pawh an rammu a ni tih kan hre thei bawk a ni.  Han thai lan ka tum ber zawk chu khatiang hunlai Mizoramin buaina a tawh hunlai  pawh khan zirlaite ko ah hian ram leh hnam humhalh nan mawhphurhna lian tak a lo in nghat der tawh  a ni. Zirlai puitling deuh leh kum upa deuh hlek, a veia, a hmangaihtute chuan rambuai lai pawh khan mi tam tak tih theih loh leh zirlai ni lo tih theih ang pawh zirlai ni chung khan an ti thei hial a ni.

    Tunah chuan kum 1966 bawr chho vel anga ram leh hnam humhalh nana silai put kher kha  a ngai ta lo, keimahni awmhmun \heuhah, ngaihtuahna tlemte tal ram leh hnam tan seng a, tha tlem tal thawh  a, mahni nun \heuh kan ven \hat phawt chuan zirlaite hi awlsam te in ram leh hnam humhalh tu ropui, mite hriat lar kher ni lo a ram leh hnam hmasawnna thlentu kan ni thei tawh a ni. A eng emaw kawng zawng takah phei chuan kan vannei hle tawh ti ila kan sawi sual lo ang e. Kan hun hmalam kan chhui kir chuan ‘thisen chhuak lovin hringfate tan sual ngaihdamna a awm lo’ tih ang deuhin thisen chhuak lo chuan ram leh hnam a humhalh theih loh kha a ni \hin.  Mahse kan hun tawn alo danglam zo ta a, buai nuaih nuaih \hin pawh kha muanglei ah kan awm ta.  Kan thlamuanna hi kan hmang thiam lovang tih hlauhawm khawpin zirlai tam tak chuan ram leh hnam humhalh a, hmangaih nachang pawh an hre tawh lo anih ber hi maw.  Kan ram leh hnam, humhalh anih lohva boral mai tur chu humhalh tur hian zirlaite hian tih theih tam tak kan nei a, chungte chu i han tarlang teh ang.
    Mi tam takin kan hriat fuh loh \hin chu kan ram leh hnam kan hmangaih dawn hian a tiha tih a, a nuna nunpui mai tur chi hi a sawi hian kan sawi vak vak a, ram kan hmangaih thu kan au chhuah puia, Puithiam tlak tlai lo an sawi ang deuh hian a taka nunpui tumna reng reng kan nei leh \hin si lo. Chutianga nun tluantling lo leh puitling lo zeta ram hmangaiha, ram leh hnam humhalh tum ai chuan kan nunah  hian rinawmna vawng mai ila a dik  a ni mai. Rinawmna chuan mi rintlakah min siam a, mi rintlak nih tawh chuan thil tam tak a tih theih \hin a ni. “A.. keichu zirlai ka ni si a, ram leh hnam humhalh tur hian tih theih ka la nei lo e, ka zirchhuak phawt anga ram chu ka la humhalh ang,”  emaw  “Kei chu ka la naupang si a, kum 6,7,8 chauh ka la ni si a, ram leh hnam ka humhalh ve thei lo,” tih hi tuman an sawi thiang lo a ni. Mi tupawh a upa emaw a naupang emaw ama awm hmunah khan rinawm takin a tih tur chu hlen chhuak mai se la, chu chuan ram leh hnam chu a humhalh mai dawn a ni.  Ram pawna awm tam tak te chu ram tan rinawm zo lovin hnamdang  nupui pasalah an nei ta mai \hin a, hei hian hnam chu a tizahawm lohin, hnam chu humhalh a hnekin a ti darh zo \hin. Chutah tak chuan zirlaite hian hnamdang nupui pasala nei lo turin rinawm ila, nasa taka thawh chiam chiam a ngai lo, ram leh hnam kan venhimna zel a ni. Ram chhung mipuite rinawm lo leh zawmthaw te reng reng chu rei an ding chang ngai lova, tin ramdang mi, pawnlama mite nuihzat leh zah loh an hlawh mai \hin a lo ni. Zirlai ka ni a, ka zirlaiah leh ka nunkawng hman reng reng ah ka rinawm phawt chuan hlawhtlinna chuan min umzui ngei dawn a, chu ka hlawhtlinna chuan khawvel mite hma ah ka hnam chu zahpuiawm lohin a siam dawn a lo ni.
    Ramin a mamawh chu mi huaisente an ni a, hnamin a mamawh chu mi huaisente an ni. Chuvang chuan huaisenna hi zirlaite hian kan nei tur a ni. Huaisenna kan tih hian kan chheh vela hnamdang mite pawng paw basa ngama lo velh chiam chiam a, kut lo thlak vak vak kha a ni ber lo a. Chu ber ai chuan fing thiam taka kan ram tana hlauhawm thil chu eng nge tih hriatchian a, chutiang thil hlauhawm leh \ha lo chu huaisen taka lo do let ngamna zawk kha a ni.  Zirlai i nih vangin i dawihzep ngawt tur a ni lova, i huaisenna chu i tipung zel anga, chu chuan ram leh hnam tan a hruaizel dawn che a ni. Thinlung huaisenna hian thil tam tak a hneh thei \hin.  Sawitawh angin mi pawngnekna hi huaisenna a ni ber lo, a hun taka i hnam chawisan ngamna kha a ni a, a hun taka i ram i zahpuiloh ngamna kha a ni. Thufing pakhat chuan ‘a nupui hmusittu chuan amah a in hmusit a ni’ a ti a, chutiang taka nupui hmusittu pawh mahni in hmusit ang hiala chhuah an nih ngai chuan ram chu Chhungpuinu anga kan ngaih \hin kha a ni a, chumi zahpuia hmusittu chuan a nu a hmusit a, a zahpui a ni. Chutiang mi chu mahni inhmusit mai pawh ni lo in, anchhia dawng tlak hial an ni. Kan peh hel rei ta mah mah e, a ruh lang rawt in i han sawi teh ang.  Mi tam tak chu phaiahte kalin zirna sang zawk ah te an zir \hin, chung an zu kalna ah chuan an hnam kha zahpuiin an sawilang ngam \hin lo fo, a \hen ramdanga awm phei chuan hnamdang nupui pasalah neiin an hnam chu an lo zahpui mai \hin.  Chutiang mi dawihzepte chuan ram leh hnam an hmuhalh thei ngai lo ang.  Eng ang mi pawh ni ila, zirlai chak lo tak pawh ni ila, ka ram leh hnam ti hmingthang leh tilangsar tura ka huaisen ngam anih ngat chuan eng ti kawng zawng emaw tal chuan kan ram chu ka lo humhalh a, ka hnam chu ka lo venghim dawn ta a ni.
    Zirlaiten ram tan tih theih tam tak kan neia, hnam venhima humhalh reng theih nan tih makmawh kan nei a ni. Chu chu insumtheihna hi a ni.  A bik takin zirlaiten insum kan mamwh em em na lai chu ruihhlo ah hian a ni. Ruihtheihthil chi hrang hrang laka kan insumtheih loh chuan kan ram hian chhiatna kan la hmachhawn ngei dawn a ni. Chu chu Luka ziak tluka chiang chu ni lo mah se mi pangngai tan chuan thlir thiam theih a ni. Tunlai ah phei chuan damdawi lo la thleng tur ‘meth’ te kan han ti a, heng lakah te hian kan insum a ngai hle dawn ni.  Rampum leh hnampum huap lo pawhin, ei leh inah te zuk leh hmuamah te, mipat hmeichiatnaah leh ruihtheihthil ah te mi insumthei lo mi chu pawn lam midang a\anga beihna tawk miah lo pawhin amah leh amah a inti chhe thei \hin a ni. Chutiang chiah chuan zirlaite leh zirlai ni lem lote pawh a tawkchin leh a \ulchin baka kan insumtheih loh chuan kan ram hian pawn lam a\anga chimral tu leh ti chhetu reng a mamawh lovanga, kan hnam hi a chelhtute ngei hian kan tichhe dawn a ni. Chuvang chuan ram leh hnam humhalh tur hian zirlaite hian insumtheihna kan neih a \ul a, kan hnam him nan kan thil tih ah reng reng a tawkchin kan hriat thiam a pawimawh hle a ni.
    Ramdang leh hnamdang hmasawn tawhte umpha tur chuan, kei ni hnam hian thawhrimna leh taimakna kan neih a \ul hle a ni. Chutiang thil ah chuan zirlaite hian mawhphurhna sang tak an nei a, India rama state hrang hrang te thiamnna el phaka, Mizoram chu chim ral loh leh mi chung ena hlangkai tur chuan zirlaite hian thiamna sangzawk kan neih a \ul hle a ni. Chutiang thiamna sangzawk nei thei tur erawh chuan taimakna kan neih a \ul  dawn a ni. Mi thatchhe reng reng an tla bal a, an rethei \hin, chutiang chiah chuan kan ram zirlaite hi an thatchhiata an zawmthawt tlat chuan, kan ram thiamna chu a tlabal ang a, kan ram chu a rethei mai dawn a ni. Ram rethei leh thiamnaa sang lo reng reng chu an aia hnam fing zawk te leh hnam hausa zawk ten chu ram chu lutin an chimral ta mai \hin a ni. Tuna kan rama officer lian ho hi kan hnam leh kan mi leh sa chu ni lo se chuan kan hnam chuan ral lam a pan anga, a ral tawh hial zawk mai thei a ni. Chumi awmzia chu ram hruaitu lu te leh sawrkar hnathawk lu te hian ram an thunun avangin tuna kan ram hruaitu lu te leh kan officer liante hian ram leh hnam chu eng emaw chenah chuan an la hum hrih a, anni dung thul thei tur hian tuna zirlai ni mek te hian ram tan taima taka an beih hram hram a ngai a ni. Chutiang ni lo a, tuna kan ram leh hnam huma chelhding tute dungthul tur awm lova thatchhiatna leh dawngdahna hmanga tihchhiaha an awm anih vaih chuan ram chu a ral anga, hnam chu a bo hlen tawh mai dawn a ni. Chuvang chuan ram leh hnam humhalhna ah hian zirlaite hian taimakna nasa tak nen lehkha kan zir a \ul a ni.
    Hnam incheina, \awng  leh nunphung  leh kan sawi fo \hin ‘tlawmngaihna’ te vawn nun zel hi zirlai te tan chuan ram leh hnam humhalh nan thil \ha tak a ni.  Tin, kan hnam \awng, kan hlate ngainep mai lo a, ngaihsan zawk hi zirlaite tihtur chu a ni. Mahni hnam incheina leh nunphungte ngainep a, mahni hnam zahpuitu chu mi zahpuiawm tak an ni a, mahni hnam incheina leh nunphungte chawisan tum tlat \hin te hi khawvelin a ngaisang zawk fo. Hnam incheina, \awng leh hlate ngaineptu chuan ram leh hnam a humhalh lo mai ni lo in a tiboral mek zawk a ni. Chuvang chuan zirlaite hian mahni hnam incheina leh \awng kan ngaihhlut tlat hian ram leh hnam humhalhna kawngah nasa takin tha kan thawh a ni tih kan inhre tur a ni.  Hnam incheina, \awng leh hla te ngaihhlut han tih ngawt hian hnamdang tihdante chu a vai vaia mausam ngawt tur tihna a ni  ber lo a. Hnam dang \awng tepawh kan thiam tho tur a nih laiin kan hnam \awng chu kan thiam ber tur a ni a. Hnam dang hla tepawh kan ngaithla fo tur chu a ni tehmeuh mai, mahse kan hnam hla hi kan thinlung ah a \hing ngai tur a ni lo. Khawvel zauzawk incheina tepawh kan lalutin kan inchei ve tur chu a ni a, kan hnam incheina erawh chuan ngaihsan a hlawh ber tur a ni. Chutiang thinlung pu zirlai chuan a hnam a humhalh a, a ram a humhalh tihna a ni. Tin, kan \awng te pawh hi a theih ang a tam hmana tih darh zauzel hian ram leh hnam chu alo \hang chho zel anga, a lo parchhuak mai dawn a lo ni.

    Zirlaiten an tih makmawh tur chu ram hmangaihtuten ram leh hnam tana theihtawp an chhuah \hinna tam takah \anpui thei lo mah se an rilru tal hel lo turin an inbuatsaih tur a ni. Zirlai techuan thil fim tak leh ngun takin an ngaihtuah anga tunlai thil awmdan tepawh a tlangpui tal chu an hre tur a ni.  Tichuan ram leh hnam humhalh nana theihtawp chhuah tute chu an tha leh zungin pui thei lo mahse la, an rilru chuan a \an tlat tur a ni. Entirnan tunlaia CYMA in Chakma ho chhiarpui a neih tur ah te pawh in ti neutral fe fe a ram hmangaihna rilru pu miah lo a ram tana thawk tute lo sawisel te hi zirlai tan chuan thi l tih loh tur a ni. Tin, MZP in Borapansuri-a ‘Zofate chawlhbuk’ a sak chungchang ang chi ah tepawh zirlaite chu thawk chhuak ve thei lo mah se ram leh hnam lo himzawk na tur a ni tih hriain thinlung lam tala lo \awiawm tlat tur a ni. Chutiang ni lova, ram hmangaih vanga nasa taka thawk tute dem zawnga thu lo vai vir vak vak te hian ram leh hnam humhalh aiin a tichhe zawk hial thei a ni.
    Ram leh hnam in hma a lo sawn zel a, a lo ral mai loh nan hian Zoram a mi tute pawh hian inpumkhatna hi an ngai pawimawh tur a ni a. Hetah hian zirlai ten \angkaina tam tak an nei thei ang. Zir laite chu hmun hrang hrang a\anga zirna in khata kalkhawmte an nih hlawm avangin zirlaite hian inpumkhat duhna thinlung nen lungrual taka zohnahthlak zawng zawng an huikhawm thei a ni.  Zirlaite hi hnam inpumkhat nan an pawimawh em em a ni.  Kan hriat \heuh angin  hnam inpumkhat lo reng reng chu an ding chhuak ngai lo, chuvang chuan kan ram leh hnam kan humhalh dawn chuan inpumkhatna hi ngaih pawimawh em em tur a ni a. Hemi tihlawhtling tur hian zirlai te hian mawhphurhna lian tak an nei a ni.

    Kan hriat \heuh angin zirlaite hian middle school an kai a\ang velin hla leh article hmang ten ram leh hnam hmangaihna lam thu in zirtirna a tel ngei \hin. Chuvang chuan zirlaite hian ram leh hnam  a chhiat a, a bo loh nana humhalh tur hian ram a hmangaih tur a ni. Ram hmangaih dan a thiaml o anih pawhin a zir ve tur a ni. MZP office ah sawn ‘I ram leh hnam humhalh la, khawvelin a dem lovang che,’ tih intar ka hmu a, ka duh tawk tlat lo kei chuan, heti hian tih danglam ka duh, ‘I ram leh hnam humhalh la khawvel leh Pathianin a dem lo ang che’ tih hial ka duh. A chhan chu, keia ngaih ve dan mai mai ah chuan, ram leh hnam humhim duhtu hi Pathian pawh hian a dem ka ring ngai lo. Zirlaite hian ram an hmangaih tur a ni a, Politician te anga thawkchhuaka ram hmangaih anga inchhala, inti langsar turin hun a nei ve kher lo thei, mahse ram hmangaih leh humhalha, hnam  venghim tur hian politics khawvela zuan luh ve kher a ngai lo tih hi kan hriat a \ha a ni. Zirlaite chu nakin lawka ram hruaitu tur te an la nih avangin ram hmangaihna rilru an put sa loh chuan hlemhletna leh eirukna thangah an awk awlsam bik em em a ni. Ram hmangaiha neitu rilru pu tu tan chuan ram hi a chhiat ai chuan mahni tuar mai pawh an huam \hin.  Chutiang mite chuan ram an siam\ha a, an tichangkanga, an tihmasawn \hin. Chuvangin zirlaite hian  ram hmangaihna thinlung hi midang put atana dah mai lovin mahni ngeiin put tur a ni.

    Hmangaihna vanga thikthuchhiatna hi zirlaite thinlungah a awm tur a ni. Bialnu emaw bialpa emaw hmangaih vanga thikthuchhiat lam ni lovin, ram leh hnam hmangaihna vangin ramdang mi leh hnamdang mi lakah thikthu tih chhiat tur a ni.  Chutiang anih loh chuan hnam dang hian kan hnam hi an zuam tial tial anga, kan ram hi min la hnehchhuh mai ang tih a hlauhawm a ni. Hmanni lawka thil thlengah pwh kan Mizopui te chanpual atana hnaruak awm post 24 lai ah hnamdang mi lak an nih kha.  Khatiang chungchangah pawh khan zirlaite chuan ram an hmangaih avangin a thikthu a tichhe tur a ni a, ram leh hnam tan chuan a tawp thlengin a\ang ngam tur a ni. Zirlai chu zirlai anih angin thil kalphung leh ram kalsiam a thlithlai reng tur a ni a, thil dik lo chu a do ngam tur a ni. Chu chu zirlaiin ram leh hnam humhalhna kawnga a mawhphurhna chu a ni.

    Zirlaite hian ram kan hmangaiha, hnam humhalh kan duh chuan hei chauh lo pawh hi mawhphurhna tam tak a la awm thei ngei ang.  Ram leh hnam venghim tur hian thisen chhuaka \an a \ul hun chu awm mah se kan hun tawn tam zawkah hian chutianga tih kher chu a ngai \hin lova, chu tihlai reng chuan kan ram chu chhan ngaiin a la awm a, humhalh ngaiin a lo la awm reng \hin si a. Chuvang chuan kan ram leh hnam  humhalh tur hian kan ngaihtuahna zawk hi kan siam\hat a hun tawh tak zet a, kan nunphung hi thlak a hun tawh tak zet a  ni. Ram leh hnam tana thisen chhuah huam hian ram leh hnam tan eiruk loh huam ta zawk ila, ram leh hnam tana nasa zawka \ang \hinte hian rinawmna leh taimakna vawng nung ta zawk ila, kan ram riangte humhalh ngai tak hi humhalhin a awm anga, chu chuan lukhawng a nei zawk ngei ang. Chutianga bul \an tur chuan zirlaite bawk hi a pawimawh leh mwhphurhna lian tak nei chu kan ni.