TUIKUK TE PUAL BIK A DEVELOPMENT AREA SIAM MZP IN A REMTI LO

Ni 5 January 2016 (Thawhlehni) a NITI Aayog hnuaia hmarchhak state a 6th Schedule Area te tana sum hai chhuah dan tur sawihona, NLUP Conference Hal,  Aizawl a neih, sorkar hotu pawimawh tak tak te tel na a, "Reang Development Area" lo lang chungchangah MZP General Headquarters chuan vawiin ni 7 January, 2016 hian thuchhuah a siam. 

"Tuikukte tana ‘Reang Development Area’ siam a, an pual bika Development Area siam hi Mizo mipuite hian kan phal dawn lova, siam tumna a lo awm a nih pawhin MZP chuan na takin kan dodal zel dawn a ni. Mizote him nan leh kan ram leh hnam tan chuan MZP chu a dinna ngaiah a la ding reng a ni tih kan sawi nawn leh duh a ni", tiin MZP Press Release No. E-93/MZP-GHQ/2015-17/12 Dt. 7th January, 2016 chuan a tarlang.

A hnuai a mi ang hi MZP thuchhuah chu a ni.

 
 Ni 5 January 2016 (Thawhlehni) a NITI Aayog hnuaia hmarchhak state te tana 6th Schedule Area te tana sum hai chhuah dan sawihona, NLUP Conference Hall a neih, sorkar hotu pawimawh tak tak tel naah, "Reang Development Area" chungchang lo lang ta mai hi MZP chuan mak a tiin, ngaihthatthlak loh a ti hle a. A tuk January ni 6th 2016-ah sorkar chuan, 'Reang Development Area' ni lovin ‘Mamit District chhunga hmun kilkhawr zawkte hmasawnna tur a ni' tiin Corrigendum a rawn siam leh a. He thil hi ngun taka ngaihtuah anih hnuah MZP chuan ngaihthatthlak loh hlein a hria a, Tuikukte chungchanga Mizoram sorkar hmalak dan chu uluk takin kan ngaichang reng dawn a ni.

    He meeting a sorkar thuchhuah ziaktu MIS officer meuh hian a ziah sual palh kan ring lo a, anmahni duhthu ngeia Mizoram chhuahsan a, lo haw leh tura Mizo mipuiin vawi tam tak a koh laia, mahni inhaivur na hmanrua atana Tripura a awm lui tlatte chungchangah, Mizo mipui leh political party zawng zawng tangrual veka hma kan lak mek lai a, Sorkar hotu lian thukhawmin Tuikukte hmasawnna tur bik nia ngaih theih an puangzar ta mai phei hi chuan min barakhaih zual a. January ni 5 2016-a Sorkar thuchhuah puanzar anih hnuah mipui an phun nasa tih an hriat avanga a tuka Corrigendum siam leh ngawt hi hriatthiam harsa kan tiin, Tuikukte a bika vulh turin Sorkarin ruahmanna siam a nei em ni tih leh an hmalakna chu mipui rilru hriat nan an thawi hmasa phawt zawk a ni em? tih hi MZP chuan Sorkar a zawt a ni. 

    Tuikuk te hian Autonomous District Counci +l(ADC) neih an lo dil tawh a, Mizo mipui ten nasa taka kan dodal avangin ADC chu pek an ni ta lova. Chumi hnuah Bru Development Council an ngiat leh a hei pawh hi Mizo mipuiten kan duhloh avangin tihhlawhtlin sak an ni lo leh a ni. Tuna taka Tuikukte tana ‘Reang Development Area’ siam a, an pual bika Development Area siam hi Mizo mipuite hian kan phal dawn lova, siam tumna a lo awm a nih pawhin MZP chuan na takin kan dodal zel dawn a ni. Mizote him nan leh kan ram leh hnam tan chuan MZP chu a dinna ngaiah a la ding reng a ni tih kan sawi nawn leh duh a ni.