ZORAM NI URHSUN TAKA HMAN A NI DAWN

Zoram ni chungchangah Organising Committee Secretary L.Ramdinliana Renthlei chuan a hnuai a mi ang hian thuchhuah a siam-

Vawiin 18th February 2016 (Ningani) chawhnu dar 1:00 khan MZP Pisapui-a ‘Zoram Ni’ 5th March 1966-a India Sorkarin a ramchhung mite chunga vawiin thlenga ala tih ngai loh a Jet Fighter hmanga Mizoram vawi tam tak a bomb champha kumin 2016 March ni 5 hman dan tur rel a ni a. He hun hi Pu Lalsangzuala Ngente, Chaiman Zoram Ni Organising Committee in a kaihruai a ni.


Meeting chuan 5th March 2016 ‘Zoram Ni’ chu urhsun taka hman ni se a ti a, kum 2016 Zoram Ni thupui atan “Tho la ding ta che” tih hman tur a ni a. Zoram Ni hian Millenium Centre kawt atanga tan in Vanapa hall kawt thleng kawng zawh ni se meeting chuan a ti bawk a ni. Zoram Ni hian Aizawl khawpui hmun remchang laiah banner tar ni se, Zoram Ni chungchang mipuite chhiar atan placard siam ni se kan ti bawk a ni.

 

Zoram Ni Organising Committee chuan Mizo mipui zawng zawngte he Ni hmanna turah hian tel turin a sawm bawk a, 5th March, 1966 a Mizote tawrhna zawng zawng khan ram leh hnam tana inpekna thar leh hnam hmangaihna rilru min puttir se, Mizo leh Mizo inkara inhriatthiamlohna tam tak awm tawhte theihnghilh a, Zofate inpumkhatna Ni atan ‘Zoram Ni’ tia hman hi a buatsaihtute duh dan a ni. He ni hi kan hliam hluite thawi dama a awmna ni, tlukna ata tho va rilru thar nen Zoram tan Zofate ke penchhuahna ni atan hmang theuh turin kan duh a. Chhung tinte pawhin induhsak tawnna ni atan te, kohhran tin pawhin Pathian hnena Mizote min kaiharh tura dilna neiin tawngtaina ni atan te hman ni thei se organising committee chuan a duh takzet a, ZORAM NI hi thinlung taka hmang turin Zofa zawng zawngte kan sawm a ni.