CHAKMA FOREIGNER PUNG CHAK LUTUK ZIRCHIANG TUR SUB-COMMITTEE DIN A NI

MZP PRESS RELEASE

    Vawiin 18th January, 2016(Thawhtanni) chhun dar 12:00 khan MZP Conference Hall, MZP Pisapui-ah Executive committee meeting neih a ni a, meeting hi Pu Lalsangzuala Ngente President in a  kaihruai a ni. Meeting ah hian MZP Assembly rorel hrang hrang bawhzui dan tur leh Chakma Foreigner pung chak lutuk chungchangte rel a ni.

    Meeting chuan Mizorama Chakma foreigner pung chak lutuk chu veiawm a ti hle a. Kum 2015 chhunga Tlabung damdawiina naupiang zawng zawng zinga naupiang 81 (81%) chu Chakma a ni ta mai chu ngaih a ti tha  lo hle a. An pun chak dan hian ngaih a ti tha thei lova, dan lova rawn pem lut an tam ta viau nia hriatna a piang lo thei lova, Chakma foreigner an pun chak dan lutukte chu MZP chuan tha lo a ti hle a,  zirchian ngai nia hriain zir chiang tur Sub - Committee din nise tiin meeting chuan a rel a ni.

    Chakma te hi Bangladesh atangin dan lovin Mizoram chhungah an lo lut nasa hle tih chhiarpui atangin a lang thei a. Chhiarpui hmasa ber kum 1901 ah Chakma mi 198 lek an awm laiin tun dinhmunah chuan Mizoram chhungah Chakma mi 1,50,000 vel zet an awm tawh anga ngaih a ni a. An pun chak dan hian Chakma te chu inthlah pun dan pangngai a inthlah pung ni lo in Bangladesh atangin dan lovin mi thahnem tak a rukin an lo pem lut tih a nemnghet a ni. Hetiang ang zel a kan kal chuan kar lo ah Chakma te hian Mizoram chhunga Mizote tan an hnawksak hle dawn niin MZP chuan a ngaih avangin, Bangladesh atanga dan lova a ruka lo pem lut Chakma te chu dapchhuah an nih theih nan leh dan anga an chunga hmala turin Sorkar laipui leh State sorkar chu kan ngen tak zet zet a ni.

    Ramri venghimtu BSF te pawh ram dang atanga hnam dang dan lova rawn pem lutte venna leh dapchhuah kawngah hian an thawh tur tak thawh nachang hria a, taimak chhuah lehzual turin MZP chuan a duh a, ram venhimna kawnga an tih tur tak hria a, thawk turin kan beisei nawn leh a, dan lova rawn pem lut tur venna kawngah inthlahdah lova, an thawh tur tak thahnemngai leh taima taka thawk turin MZP chuan BSF te a ngen a ni.
   

(HMANGAIHHLIMA)
Secretary i/c Publicity