MZP HMALAKNA HRANG HRANG TE CHIEF MINISTER SAWIPUI A NI

MZP PRESS RELEASE
28th January 2016

Nimin ni 27th January 2016(Nilaini) tlai dar 5:00 khan MZP hruaitute chuan Chief Minister Pu Lal Thanhawla chu a chenna inah an hmu a, pawl hmalakna hrang hrang Career Awareness Campaign chungchangte, Mizoram sorkar Pisa tanhun sawnhma chungchang te, Mizoram University water supply chungchang te, Advertisement chhuah lova hnalak chungchang te leh Mizoram State leh Assam inri na a buaina awm thin chunchang te thlen a ni.

MZP Gen. Hqrs. Elected OBs leh C.M of Mizoram

MZP chuan hun rei tak ata tawh Mizoram leh Assam ramri chungchangah buaina kan lo tawk tawh thin a, state pahnihin kan pawmtlan theih tur ramri felfai tak kan neih loh avangin vawiin thlengin ram chin inchuhin kan buai a hei hi pawi kan ti hle a ni. India ram chhung hmun hrang hrang a ramri buai te ang tho in sorkar laipui hian Assam nena kan ramri buai hi min chinfel sak mai dawnlo niin a lang a. Ram chin inchuh a a ruka kan in nawr reng bawk si avangin kan ram chin leh Mizo ten kan luahlum chin hi chu hmasawnna peng hrang hrang hmanga ti hmasawn a, luahlum hi kan ram chin hauh nana tha ber a ni a. Hmasawnna hrang hrang hmanga ramri cheibawl rengtu Assam sorkar do let nan leh kan ram chin nghet taka humhalh nan Boundary Development Wing/ Cell siam anih theih nana hma la turin Chief Minister hnenah hian ngenna thlen a ni a, Chief Minister chuan atul anga bawhzui a tum thu MZP hruaitute hi minlo hrilh a ni.

Kan hriat angin kum 2015-2016 school session atangin Mizorama zirna in hrang hrang tan hun chu sawnhma a lo ni ta a, school tan hun sawnhma hi MZP chuan a zirchianna atangin kan thatpui dawn hle niin a ngai a ni. School tan hun sawnhma pawh hi ti danglam tawh lova a ngai anga kal zel hi MZP duh dan a ni e. MZP chuan ‘Mizoram sorkar Pisa tan hun sawnhma a nih theih nan hmalak ni rawh se’ tiin Assembly 2015 khan a lo rel a. MZP in sorkar Pisa tan hun sawn hma kan duh chhan bulpui ber chu ni eng kan hman tangkai hun (day light saving time) chhung a rei sawt tur hi a ni a, hetiang mil tur hian khawvel ram tam zawk leh hausa zawk te pawhin an hun (time zone) an lo herh mil thin a ni.

Tan hun sawnhma chungchang hi kum 2010-a MZP leh North East Students' Organisation (NESO) tangkawpin 'Separate time zone for North East' tih thupui hmanga seminar a buatsaih atanga ngaihdan lo piang chho tan a ni a. India ram zau takin hunbi (time zone) inang tlang kan hman chu hmar lam leh hmarchhak lamah ni a chhuah hma zawk avang leh, tlai lamah ni a tlak hma leh zawk si avangin kan tan a hlawk lo bik hle a. Hemi avang hian hmarchhak a chengte tan hunbi hran siam ni se tiin zirlai pawl ten sorkar laipuiah te rawtna kan lo thlen tawh thin a. Amaherawhchu hunbi then hran (separate time zone) anih theih nan sorkar laipuiin hma a lak loh avang leh then hran mai tumna a awm bawk si loh avangin, sana herh hma lova thil tih hun tan hma mai chu thil awlsam leh tih chi tak leh, 'time zone' hran kan la neih theih si loh avanga ni eng kan hmuh hun chhung kan hman tangkai dan awlsam ber tur a nih dawn avangin, sorkar pisa leh hnathawh tan hun zawng zawng tih hma chhoh zel nise tih chu MZP duhdan a ni. Mizoram sorkar Pisa tanhun sawnhma chungchang hi Chief Minister hnenah thlen a ni a, Chief Minister hian tha a tih thu leh sorkar Pisa tanhun sawnhma a nih theih nan atul anga hmalak a tum thu a sawi bawk a ni.

(L.RAMDINLIANA RENTHELI)
General Secretary