MANIPUR TRIBAL MOVEMENT ROAD CONSTRUCTION HNATHAWH HAWNNA MZP IN A TELPUI

Nimin ni 23.2.2016 khan Manipur Tribal Movement Road construction huaihawtin Sinzawl,Manipurah Mizoram leh Manipur in kalpawhna kawng pawimawh tak,Tuivai lei leh Sinzawl in kar kawng chhe siamthatna Flag off leh Commencement program hman a ni a. He kawng siam that Programme hi Pu S.Zam Khan Pau Vice Chairman,Manipur Tribal Movement Road Construction in kaihruaiin, Pu Lalmuanpuia Punte Gen. Secy ZORO in hna thawh tan theih nan Silai kap in,Pu B.Vanlaltana Vice President MZP chuan hnathawkturte a vailiam(flag off) ani. He hunah hian ZoRO Gen.Hqrs leh MSU aiawhte pawhin thu an sawi ani.

MZP Vice President Pu B.Vanlaltana'n thu a sawi lai

He hunah hian B . Vanlaltana MZP Vice President hian thusawiin,"MZP hian Zofate insuihkhawm hi kan thupui berte zinga a mi ka ni a,chumi avangin Zofate inkhawmpui lian ZOFEST hmun hrang hrangah kan buatsaih thin a. Tuna kan unau Manipur a mite harsatna in tawh mek hi MZP hian kan en liam mai mai dawn lova, in thlavang hauhin theih tawp chhuahin hma kan la zel dawn a ni. Mizorama in unaute hian kan theih tawp chhuahin hma kan la zel dawn a, kan ram hruaitute hnenah pawh kan lo thlen dawn ani. Vawiina hetiang Kawng kan siamthat hian kawng chauh siamlo a,inunauna tih ngheh leh zual a, a thar a inunauna thlen se ka duh ani," ati a.

He hunah thusawitu dang Pu H.Mangchinkhup,Chief Convener,JAC Against Anti Tribal Bills chuan,"He kawng Tuivai lei leh Sinzawl inkar kawng chhe lutuk hi Churachandpur Zohnahthlak te hian kan tuar a, inkal pawhna a buai thlakin harsatna tamtak kan tawk mek ani, he kawng kan siam that hi,Zofate inpumkhatna atan leh in unauna a nghet deuh deuh nan te Churachandpur a zofate enzawina leh chak lakluhna atan kawng pawimawhtak a ni a,Manipur State ah Bandh leh Economic blockage a awm pawha, Manipur Zohnahthlak te tan kawng pawimawh leh thillak luhna awm chhun ani a,Chubakah Manipur sawrkar in Tlangmite an ngaihsak duhlo vangin,Manipur sawrkar hnuaiah in nghat renglo a, hei kan inkal pawhna hi keimahni ngeiin kan siam angai ani,chuvangin kohhran hrang hrang leh tlawmngai pawl leh Mitha hnem ngaite avang hian an pawisa thawhkhawm hmangin he kawng KM14 laia thui kawng chhe ltk kan siam tha dawn ani." ati bawk

Paul Lalchhanhima Asst.Secy JAC leh MZP Headquarters President Manipur pawn thusawiin,"He kawng hi Mizoram leh Manipur a Zohnahthlak te tan inkal pawhna kawng pawimawh tak a ni a,harsatna kan neih hian he kawng hi kan inkal pawhna awm chhun ani bawk, Manipur Zofate hian insuihkhawm kan duh a,kan tum mek a, chumi tur chuan kan in buaisaih mek a, hengte hi MZP in ZoFEST an buatsaihna zara thleng mek ani.Manipur a in unaute harsatna leh manganna kan tawh mekte hi Mizorama kan unaute hian a takin min hmuhpui a,hma min lakpui zel bawk a, lawmawm kati a, kan in phatsat tur a nilo." ati bawk.

MZP Vice President in Movement a Flag off lai

Reported by- MZP PR/ L.Ramdinliana Renthlei, GS.