Nimin Ni 26th April, 2016 (Thawhlehni) khan MZP Unification Tour neia Tahan, Myanmar a cham mek Pu Lalsangzuala Ngente President MZP General Headquarters leh MZP hruaitu dangte chuan Khampat Bungpui tlawh in, Sanmyo Bloc, Kalaymo, Satawm district-a Democracy sawrkar thar lawmna ah sawm an nih angin an hmanpui nghal bawk a ni.
MZP chuan Mizote thinglunga hmun pawimawh tak changtu Khampat Bung chu humhalh a tulzia hria in a humhalh kawngah Mizoram Sorkar mai bakah Mizo mipuite thahnem ngai turin thinglung takin a sawm a. Khampat Bung bul hnaia khaw mite hnenah pawh Khampat Bung hian Mizote tan pawimawhna lian tak a nei thu hrilh in, humhalhna kawngah hmalak pui turin an sawm nghal bawk. MZP hruaitu ten Khampat bung tlawh a hun an hman zawh hian Sanmyo Bloc, Kalaymo, Satawm District-a Democracy sawrkar thar lawmna neihah sawm an nih angin MZP hruaitute hian an hmanpui leh bawk.
Sorkar thar lawmna inkhawmah hian MP atana thlantlin, Pi Khawtinsiami chuan thusawiin, MZP ten an tawiawm vanga lawmthu sawi in, theihtawp chhuaha Zofa unau hmun hrang hrang a mite insuihkhawmna kawnga hma an lo lak tawhna fak in, nasa zawka hmala chhunzawm zel turin a fuih nghal bawk.
He huna thusawitu dang Pu Lalthawmthanga, Foreign Affairs Minister chuan, “Kuki, Thado, Lai, Zo leh Mizo tia kan buai thin hian harsatna min siamsak thin a. Hei ai chuan inlungrual tak leh in ngeih tlang taka kan awm hian kan insuihkhawm a awl zawk a ni tih hmun hrang hranga Zofa ten kan hriat atul a. Unau hmel hai tawh lo a insuihkhawmna lamtluang kan zawh tlan dial dial a ngai a ni” a ti.
Democracy sorkar thar lawmnaah hian Dr. Riangvela, Falam bialtu MP leh Tauh Yi Kyaw, Sagai Division atang thlantlin te pawhin thusawina hun an hmang bawk a ni.
MZP hruaitu Unification Tour a kalte hian Tahan leh Myanmar hmun hrang hrang an tlawh kual hnuin naktuk hian Myanmar chhauhsanin Mizoram an rawn pan dawn a ni.
No comments:
Post a Comment