MZP chuan Mizoram Board of School Education(MBSE)-in HSLC 2016 Result rang taka a ti chhuak thei chu lawmawm a tiin, thawktute thawhrimnaah lawmthu a sawi tak meuh meuh a ni. Ram leilungfa zinga mi in Pakhatna dinhmun kan hauh hi MZP chuan a chhuang takzet a, Top ten-a Mizo zirlai Pakua lai an lang hi MZP chuan a chhuangin a lawmpui takzet a ni. Hlawhtlinna hmu zawng zawngte MZP chuan thinlung takin a lawmpui a, an hmalam hunah duhsakna a hlan nghal bawk a ni. Tin, hlawhtlinna hmel hmu hrih lo, vanduai ta te erawh a tawrhpui takzet a, hnual mai lova theihtawpa bei chhunzawm zel turin a duh tak zet a ni.
Kum tina a lo tih thin angin MZP chuan Top Ten-a Mizo tlingte chu lawmpuina hun a siamsak leh dawn a. Lawmpuina thil pek hi mi thilphalte hnen atangin dap khawm a ni leh dawn a, zirlaite cho phurna kawnga in pete tan MZP Office-ah ngaihven theih reng a ni. Tin, hun hmasa lamah heng chawimawi phute chawimawi kawngah hian mi inphal tak tak, MZP kaltlanga in sengso an lo awm tawh thin a, heng mite inpekna hi MZP chuan chhuanawm a ti a, an inpekna avanga Zirlaite hmalam hunah phurna nasa tak a siam a ni tih a hriatin, an chungah MZP chuan lawmthu a sawi nawn leh a ni.
No comments:
Post a Comment